كلام عالماشي

اليوم وعلي غير عادتي حبيت نكتب شيئ تلقائي ومن غير لا نسخ ولا لصق ولا اعداد مسبق للموضوع ، ولكن نبي نكتب عللي يخطر في بالي.انتو تعرفوا ان جو الشتي "الشتاء" هو الجو اللي يحلى فيه السمر والهدرزة ولو ان الوقت توا مش ليل ولكن الشمس توارت خلف الغيوم وكأن الليل اقترب إلا اننا مازلنا في الصباح، من نعم الله علينا هذا الشتاء ان المطر هطل بكميات وافرة لترتوي ارضنا العطشى وتتفتح ورودها .الحمد لله.ولعل الخير يعم على الجميع. حتى اولئك الذين يتسرب ماء المطر من اسقف منازلهم يفرحون بالمطر. تذكرت الان قولا فيه مغزى وحكمة ولايخلو من الطرافة الا وهو :- " اننا جميعا نتحصل على على نفس المقدار من الثلج (البرد) لكن الأغنياء يتحصلون عليه في فترة الصيف ، أما الفقراء فيتحصلون عليه في الشتاء(نزلات برد ربما)"-ترجمة بتصرف.على كل حال نتمنى أن يهطل المطر في العام القادم وبكميات اكبر إن شاء الله بعدما تكون جميع عمليات بناء مدينة طرابلس قد انتهت (شورك متفاءل هلبة) وتكون كل الطرق قد تم تعبيدها ومانشوفوش ولا قطرة امية في اي طريق، لا في عرادة ولا في في الهضبة ولا حتى في الطريق السريع.وان شاءالله مش حيشكي حد من سقف حوشه يقطر... ولا المجاري فاضت في بوسليم ولا تاجوراء غرقت بمية المطر. هذه أماني بسيطة وسهل تحقيقها وخصوصا بعد مايتم ازالة نصف مباني مدينة طرابلس لغرض التطوير طبعاً ويفر سكان المباني المزالة إلى ضواحي المدينة . الى عين زارة وجنزور والسواني وطريق المطار وفيه من يبي يبعد اكثر ويمشي للقرةبوللي ويبني خارج المخطط باش عاد بعدين يجيه جهاز التطوير بعد عدة سنوات ويقولوله حوشك جي في الازالة لغرض تطوير ضواحي المدينة . عموما مانسبقوش الاحدات وإن شاء الله يكون خيرعلى الجميع .و بلا اي نفاق مافيش مواطن يكره الخير لبلاده واحني نبوا بلادنا تكون احس واجمل بلاد واخيرا وحتى ولو ماتمش تنفيذ او استكمال كل هالمشاريع الضخمة نتمنى حاجة وحدة ان المطر تصب السنة الجاية..وكل عام وانتم بخير .